Na tese de doutoramento da especialista en obstetricia e xinecoloxía Susana Iglesias, ‘Nacemento baixo a auga. Estudo retrospectivo en hospital de baixa intervención’, a enfermeira decidiu afondar na cuestión dos partos baixo a auga na que levou a cabo un estudo observacional de 1191 nacementos no Hospital Comarcal do Salnés.
Neste estudo concluíu que “os partos en auga non están asociados a un aumento significativo de resultados adversos nin para a nai nin para o neonato”. Segundo a doutora, “nos embarazos de baixo risco, a inmersión en auga quente durante a dilatación considérase unha opción eficaz como método de alivio de dor. En cambio, o nacemento en auga conta con menos evidencia científica e discútese a súa seguridade”.
A idea de pór en marcha esta investigación, explica a súa autora, xurdiu tendo en conta que as “sociedades científicas de obstetras, xinecólogos e xinecólogas, matronas e enfermeiros e enfermeiras de numerosos países, defenden que o parto en auga debe ser unha opción dispoñible para as embarazadas de baixo risco xunto con información actualizada dos seus posibles beneficios e riscos”.
Por outra banda, denuncia que “algúns hospitais que contan con bañeira obstétrica prohibiron o seu uso durante a dilatación e/ou o parto, limitando o dereito da muller a tomar unha decisión informada sobre este tema”.
Por isto, Susana Iglesias conclúe que “parece que a prohibición do uso da inmersión durante a dilatación e/ou parto non se basea en ciencia, senón en prexuízos“.
