InicioEconomíaSindicatos do metal denuncian que a patronal "teima en establecer recortes"

Sindicatos do metal denuncian que a patronal “teima en establecer recortes”

"Un convenio de transición non pode levar a recortes, e se non se está en disposición de entender iso, imos a un convenio ao uso", avisan.

PUBLICADO O

Os sindicatos do metal da provincia de Pontevedra advertiron este martes de que se a patronal mantén a súa proposta de “recortes” no convenio para 2020-2021, que consideran “de transición”, reclamarán reiniciar as negociacións e, en lugar de buscar acordo para puntos concretos, buscarán “un convenio normalizado” e negociado na súa integridade.

Así se pronunciaron os axentes sociais despois de que a reunión que mantiveron este martes ambas as partes acabase sen chegar a un consenso debido a que a patronal “teima en establecer recortes”.

As organizacións sindicais, CC.OO., CIG e UGT, manteñen que ao tratar as negociacións de alcanzar un convenio de transición non se lle debe “dar moitas voltas ás condicións”. “Demos alternativas, pero queren recortes, así que imos a por un convenio ao uso e recuperamos as peticións que deixaramos polo camiño”, insistiron.

En concreto, o portavoz de Comisións Obreiras, Celso Carneiro, indicou que estes puntos son a redución de xornada, regularización do calendario laboral, subrogación, licenzas e gardas, o desenvolvemento por completo o plan de igualdade e o protocolo de acoso, e o desenvolvemento dos grupos profesionais e categorías.

Neste sentido, lembrou que para o convenio de transición conseguiron “unificar as peticións dos tres sindicatos”, o que garantiría “a estabilidade e a paz social”, ante o que chamou á patronal a “reflexionar”. “Un convenio de transición non pode levar a recortes, e se non se está en disposición de entender iso, imos a un convenio ao uso”, remarcou.

NOVA NEGOCIACIÓN E MOBILIZACIÓNS

Da mesma forma pronunciouse Xulio Fernández, da CIG, que considerou que a posición da patronal demostra que os empresarios “se negan a un convenio de transición”, polo que os sindicatos irán “a por un convenio normalizado”.

“Entendemos que volvemos ao comezo agás que a patronal volva entrar en razón e lle sirva un convenio de transición, senón empezariamos unha nova negociación e, se se enquista, empezariamos a mobilizarnos”, avisou Fernández, que indicou que a próxima reunión do metal celebrarase o venres 19.

Pola súa banda, UGT lamentou que a patronal se manteña “inflexible” nalgunhas das súas propostas, como a de deixar de pagar mensualmente a indemnización de fin de contrato, e de manterse inamovible sobre a presenza de ETT nas empresas.

Este sindicato constatou que “a día de hoxe non se dan as circunstancias para negociar o convenio como habitualmente”, polo que sinalou que os axentes sociais expuxeron prorrogar o convenio en vigor, “actualizando os salarios” de 2020 e 2021, e así “facilitar unha negociación completa en 2022, cunha maior visión do escenario produtivo”, unha proposta que “tampouco foi aceptada pola patronal”.

A este respecto, UGT criticou que a patronal “non quere apostar pola negociación” e prefire dilatar o proceso o máis posible, “coa escusa do COVID-19”.

“SORPRESA” DA PATRONAL POLO “XIRO” DOS SINDICATOS

Pola súa banda, o secretario xeral de Asime e portavoz da patronal, Enrique Mallón, trasladou que a estratexia dos sindicatos este martes “sorprendeu” aos empresarios, que confiaban en alcanzar un acordo definitivo este martes, e atopouse cun “xiro inesperado” da parte social.

Segundo indicou Mallón, os sindicatos puxeron sobre a mesa a posibilidade de “incrementar o ámbito de negociación, introducindo neste momento final numerosos artigos para negociar”.

“Seguimos confiando no acordo, pero nun acordo razoable, tendo en conta a realidade empresarial e industrial, que atravesa un momento complexo de perda de emprego e facturación en case todas as actividades do sector”, sinalou o secretario xeral de Asime.

Así, a patronal esixiu que se contemple a modificación do artigo relativo á contratación de indefinidos, co pago da indemnización ao final do contrato, e asegurou que ofrece unha “mellora salarial relevante”, que podería alcanzar “un 2 % na súa totalidade” para os dous anos de convenio.

ÚLTIMAS

Encontran o cadáver desmembrado dunha muller dentro dunha maleta nun solar de Vigo

Un home achou na tarde deste xoves un cadáver en avanzado estado de descomposición,...

Dúas persoas trasladadas ao hospital por un incendio nun edificio en Nigrán

Dúas persoas foron trasladadas, unha delas con queimaduras, tras producirse un incendio, que se...

A xestora do PP de Vigo promete unha “transición modélica” cun partido “unido”

A xunta xestora que asumirá as rendas do PP de Vigo tras a renuncia...

A Xunta destinará 1,8 millóns de fondos europeos facer do Mosteiro de Oia un gran establecemento turístico

Case dous millóns a facer do Mosteiro de Oia un gran establecemento turístico no Camiño...