A área sanitaria de Vigo informou da citación, nos próximas días, de case 11.000 persoas das comarcas da Louriña e Condado-Paradanta para a realización de probas para detectar casos asintomáticos de COVID-19.
Así, convocarase para facer probas PCR a 7.000 veciños do Porriño, a 1.811 de Mondariz, a 1.669 das Neves e a 380 veciños de Mondariz-Balneario. Así, os veciños destes últimos municipios xa empezaron a acudir ao posto covid-auto do hospital Meixoeiro (e seguirano facendo ata o domingo), mentres que os citados do Porriño terán que acudir ao Instituto Feiral de Vigo (Ifevi) entre este venres e o domingo.
Estes cribados súmanse aos xa realizados nos últimos días entre veciños doutros municipios da área viguesa, en total máis de 13.500 persoas de Tomiño, Mos, A Cañiza, Salvaterra e Ponteareas. A eles súmanse as probas realizadas a veciños da cidade olívica e doutros municipios.
O obxectivo da realización destas probas, destinadas a persoas entre 20 e 70 anos de idade, é captar o maior número posible de contaxiados asintomáticos, aínda que o índice de participación, salvo excepcións, non adoita superar o 60 ou 65 % dos convocados.
No cribado realizado no Ifevi a veciños de Vigo, Salvaterra e Ponteareas, participaron case 21.000 persoas (algo máis do 61 % dos citados) e detectáronse 24 casos positivos (3 deles de Ponteareas, ningún de Salvaterra e o resto de Vigo).
‘UNIDADE MÓBIL’ EN VIGO
Por outra banda, o hospital vigués Povisa, do grupo Rivera Salud, informou de que, desde este xoves, está a realizar probas para detectar o COVID-19 no aparcadoiro de Balaídos, onde se instalou unha carpa.
Este operativo permite a obtención de mostras sen necesidade de que as persoas participantes baixen do seu coche, e estará en funcionamento de 8 a 20 horas. Para participar non será necesario solicitar cita previa, e os resultados enviaranse, nun prazo máximo dun día, por correo electrónico.