Un home foi detido pola Garda Civil de Pontevedra tras compartir diverso contido pedófilo a través da aplicación ‘Discord’. O home, veciño de Vigo e de 31 anos, está acusado como presunto autor dun delito de corrupción de menores e foi posto a disposición do Xulgado de Instrución número 2 para quedar despois en liberdade con cargos.

O detido aproveitábase dos servizos ofrecidos pola citada aplicación para compartir arquivos de contido pedófilo desde distintas direccións ‘IP’ que pertencían a provedores de servizos españois. A través deste medio, reuníanse máis de 500 usuarios de distintos países.

O ‘modus operandi’ do acusado consistía en utilizar conexións ‘wifi’ instaladas en domicilios doutros usuarios para recompilar e compartir imaxes de contido pedófilo, explica a Garda Civil, o que dificultou aos investigadores o traballo para contrastar a súa identidade.

Finalmente, os axentes lograron localizar o individuo e rexistrar o seu domicilio, onde incautaron un computador portátil e dous teléfonos móbiles.

A investigación enmárcase na operación ‘Farisca’, en colaboración coa Corporación Norteamericana National Center For Missin&Exploted Children (NCMEC) a través da Axencia Homeland Security Investigations (HSI), do Departamento de Seguridade Nacional dos Estados Unidos.