O proxecto europeo Atlantic Maritime Ecosystem Network (MarENet), coordinado pola Universidade de Vigo (UVigo), puxo en marcha o Blue Entrepreneurship Programme, un programa de emprendimiento polo que impulsará propostas de negocio innovadoras de Irlanda, Francia e España relacionadas coa economía azul.

Segundo informou a universidade viguesa, o obxectivo desta iniciativa é fortalecer a cooperación entre as empresas marítimas e o ámbito académico para “mellorar a visibilidade das oportunidades de formación e profesionais” no sector da economía azul en Europa.

O prazo de solicitudes permanecerá aberto ata o próximo 28 de febreiro e en total seleccionaranse un máximo de 30 propostas, que poderán estar relacionadas con diferentes sectores como a construción naval, portos, pesca, acuicultura, sectores emerxentes ou biotecnoloxía, entre outros.

O programa terá unha duración de 10 meses e dividirase en cinco fases a través das que se madurarán os proxectos e elixiranse aqueles con maior potencial. Ademais, os participantes poderán asistir a cursos de formación, presentar as súas propostas a investidores e contarán coas achegas de expertos.