Delegados da CIG concentráronse este xoves ante a sede territorial da Xunta en Vigo para reclamar a subrogación de 25 traballadores procedentes dun centro especial de emprego e que desenvolvían o seu labor no servizo de atención a doantes de sangue do centro ADOS (Axencia de Doazón de Órganos e Sangue) de Vigo.

Segundo explicou a portavoz do sindicato, Sefi Romeu, trátase de 25 persoas que traballaron no centro desde 2018 e que, hai un par de días, foron “despedidos” porque o seu servizo foi adxudicado polo Sergas a outra empresa.

A CIG fai “responsable” destes despedimentos á administracióna autonómica, á que reclamou que tome medidas para que eses traballadores sexan subrogados.

“Reivindicamos o mantemento dos empregos e que a Xunta se faga responsable deses despedimentos inxustos”, afirmou Romeu, quen explicou que o sindicato xa solicitou unha reunión coa nova empresa adxudicataria do servizo e coa xerencia do Sergas.