A Policía Local de Vigo impuxo un centenar de sancións e detivo a unha persoa por diferentes violacións da normativa sanitaria para combater a pandemia da covid-19. Segundo informou este domingo o Concello de Vigo, en total foron 99 as sancións impostas entre as 6:30 do sábado e as 6:30 do domingo.

Durante este tempo, os axentes estableceron máis de vinte controis en diferentes lugares da cidade como a Avenida de Madrid, Ángel de Lema e Marina, Samil, Progreso, Cánovas del Castillo, Ricardo Mella, a Avenida de Galicia e a Estrada de Camposancos, entre outros.

Case a metade das sancións, 48, foron por vulneración do peche perimetral decretado para Vigo. Outras dez denuncias foron por consumo de alcol na vía pública, nove por non levar máscara, oito foron para persoas reunidas sen gardar a distancia de seguridade, e outro oito por incumprir o toque de queda.

Ademais, impuxéronse sete sanciones en domicilios a persoas non convivientes, outras sete por incumprimento da norma de aforamento en locais, outra por infrinxir a normativa de terrazas e unha máis por falta de respecto da autoridade. 

UNHA DETENCIÓN

A persoa detida circulaba pola vía pública ás 23:30 horas sen xustificación, saltando semáforos en vermello. Cando foi sometida a un test de drogas mostrouse agresiva cos axentes tanto verbal como fisicamente, polo que tivo que ser reducida e detida. EFE