O goberno local de Vigo acusou á Xunta de “ocultar” o proxecto das novas instalacións deportivas que se situarán na zona do Ifevi e advertiu de que “non tolerará” que “atrase nin un só día” a ampliación do recinto feiral, “imprescindible” para a celebración da próxima edición de Conxemar.
Así se pronunciou despois de que o presidente da Xunta, Alberto Núñez Feijóo, anunciase que o Goberno galego construirá un módulo de atletismo na ampliación do Ifevi.
A este respecto, o goberno local de Vigo afirmou que descoñece este proxecto “dado que non foi informado pola Xunta”, da que supón “un novo agravio comparativo” ao “ocultar a información” e actuar “con total escurantismo”.
Ademais, asegurou que a proposta, que “non pode ser valorada en profundidade pola falta de información” aínda que levará a cabo “en chan municipal”, “pretende agochar que non queren levar adiante a instalación definitiva en Balaídos”. Por iso, instou ao Executivo que preside Núñez Feijóo a “cumprir coas súas obrigas” e “transferir 5,5 millóns de euros para arranxar as instalacións supramunicipais” desa zona.
Precisamente, Feijóo indicou que a Xunta non renuncia á reforma das pistas de Balaídos e que dispón do diñeiro e do proxecto, pero non da licenza municipal “pola situación urbanística de Vigo”, en alusión á anulación do Plan Xeral de 2008.
Así mesmo, o goberno local considerou que “da información recibida a través dos medios inférese a pretensión de construír unha instalación provisional e desmontable” que, de ser definitiva, pareceríalle “inadmisible”.
En todo caso, resaltou que, se é esa a opción, a Xunta “podería alugar xa o pavillón 3 do Ifevi” e iniciar “de inmediato” a instalación das pistas. “Sorpréndenos esta proposta porque para isto non necesitaban esperar. Se o que pretenden é alugar unha nave, xa poderían facelo hai dez anos”, recalcaron fontes municipais.
Aínda que insistiu en que a procura de solucións definitivas para as pistas supramunicipais de Balaídos “contará sempre co apoio do Concello de Vigo”, o goberno local advertiu de que “en ningún caso renunciará aos 5,5 millóns de euros que Feijóo lle debe á cidade”. Así, concluíu que resulta “evidente” que “as instalacións definitivas debe emprazarse nas pistas deportivas de Balaídos”.
A Xunta instalará un módulo de atletismo na ampliación do IFEVI
