O BNG de Vigo urxiu este xoves unha “rectificación” do goberno local, ao que instou a implementar axudas directas para os hostaleiros, que están nun “momento crítico” e con “risco de desaparecer” para moitos negocios.
Así o manifestaron o concelleiro nacionalista, Xabier Pérez Iglesias, e a deputada no Parlamento galego, Carmela González, tras manter un encontro con hostaleiros do Casco Vello de Vigo.
O edil do BNG criticou a “deliberada inacción” das administracións ante a situación deste sector e, tras denunciar que a Xunta “ten absolutamente abandonada” á hostalaría, e que tampouco chegan axudas do Goberno central, expresou tamén a súa “preocupación” pola “actitude” do goberno local e do alcalde, Abel Caballero.
Pérez Iglesias lembrou que o goberno aprobou en solitario unha modificación de crédito para o uso de 33 millóns de euros de remanentes e incidiu en que, “no canto de enterralos só en obra pública“, deberían destinarse polo menos 10 millóns para axudas directas a comerciantes e hostaleiros, e outros dous millóns para campañas de apoio e promoción.
O concelleiro remarcou que “non é aceptable” que a única resposta que o alcalde dá aos hostaleiros sexa “que a el non lle toca”. “Non é un problema de competencias, senón de vontade política“, afirmou, e censurou que Vigo é “a única das cidades de Galicia que se nega a dar axudas directas” á hostalaría, mentres que si contempla, por exemplo, achegar 2,7 millóns para promoción turística destinados a aerolíneas.
Pola súa banda, a deputada Carmela González, recalcou que “non é xusto” que a hostalaría pague as consecuencias das medidas adoptadas para loitar contra a pandemia, e pediu que “todas as administracións estean á altura” para responder con medidas de apoio adecuadas.
A ese respecto, lamentou a ausencia de axudas por parte da administración central, e criticou que os fondos comprometidos pola Xunta foron “convocados tarde”, e estanse tramitando “con lentitude”. Ademais, esas axudas “non chegan a todos”, e “a letra pequena” está a deixar a moitos hostaleiros “fóra”.
