A Xunta de Goberno do Concello de Vigo deu luz verde este xoves á contratación dun concurso de ideas para deseñar un ascensor que comunique a zona de García Barbón (á altura de Serafín Avendaño) e o centro Vialia de Urzáiz-Vía Norte.

Deste xeito, autorizouse unha partida de 555.000 euros para os premios do concurso e a redacción do proxecto, cuxa execución terá un custo duns 6 millóns de euros. Segundo os prazos avanzados polo alcalde, Abel Caballero, en rolda de prensa, a obra podería estar finalizada en algo máis de dous anos.

O rexedor destacou en rolda de prensa que esta decisión supón o inicio “dunha das grandes obras transformadoras” de Vigo, que formará parte do programa ‘Vigo Vertical’, confinanciado con fondos europeos e, segundo explicou, a proposta gañadora debe cumprir cos obxectivos da Axenda Urbana de España, favorecendo a mobilidade sustentable, a priorización dos peóns e que facilite a consecución dos Obxectivos de Desenvolvemento Sustentable da Axenda 2030.

O concurso está dotado cun primeiro premio de 70.000 euros, e premios de 40.000 e 30.000 euros para o segundo e terceiro clasificado, respectivamente. O gañador redactará o proxecto de execución e encargarase da dirección facultativa das obras, por un prezo de 415.000 euros.

O xurado que seleccionará as mellores ideas estará composto por técnicos municipais, técnicos da Deputación de Pontevedra, de Demarcación de Estradas do Estado e da Axencia Galega de Infraestruturas, así como dos colexios profesionais de Arquitectos e Enxeñeiros de Camiños, Canles e Portos.