Estudantes e egresados de distintas titulacións da Universidade de Vigo (UVigo), asesorados por docentes, crearon unha asociación para deseñar, fabricar e operar pequenos satélites e misións espaciais. Segundo trasladou a universidade, a entidade, denominada UVigo SpaceLab, conta con ao redor dunha vintena de membros das escolas de enxeñaría da Telecomunicación, Aeronáutica e do Espazo, Industrial e Informática.

O obxectivo da creación do laboratorio pasa por complementar a formación do alumnado mediante un proxecto real e multidisciplinar, aínda que os seus membros aspiran tamén a empregalo para participar en congresos e xornadas de traballo educativas do sector. Ademais, a iniciativa permitiralles integrarse en proxectos de investigación da universidade e empresas do ámbito aeroespacial.

Esta entidade comezou a xestarse a principios deste ano, cando varios estudantes acordaron articular unha proposta para participar nunha xornada de traballo da Axencia Espacial Europea (ESA).

Un dos integrantes de UVigo SpaceLab, Manuel Diz, indicou que o equipo presentou á ESA Academy “un proxecto de microtelescopio espacial Open Little Luminary Observatory (OLLO)”, que supuxo “o primeiro intento concreto” de realizar unha misión de observación espacial no formato dun ‘cubesat’, un pequeno satélite de 10 centímetros de aresta e unha masa inferior a 1,33 quilos.

Tras a presentación desta proposta, varios membros do equipo foron seleccionados para visitar as instalacións da axencia en Bélxica xunto a outros estudantes de universidades europeas.

Así mesmo, os integrantes de UVigo SpaceLab comezaron a estudar dúas posibles misións en satélites miniaturizados para a investigación espacial, ‘pocketcubes’, ou ‘cubesats’. Unha destas centraríase na observación da Terra, mentres a segunda tería un carácter científico e relacionado coa bioloxía, para o que buscan o patrocinio de empresas.

A este respecto, Manuel Diz apuntou que aínda non se resolveu se a plataforma elixida será un ‘cubesat’ ou un ‘pocketcube’, cuxo tamaño é menor. Así, apuntou que a decisión “dependerá das análises técnicas” que indicarán “se é viable nun ou outro”.