Os casos activos de Covid-19 seguen en descenso por terceira xornada consecutiva en Galicia, ata situarse en 9.952, que supoñen 63 menos que este luns, e baixan tamén a 383 os novos contaxios, deles 350 confirmados por PCR nas últimas 24 horas, mentres que aumentan en 425 as altas con respecto a este luns.
Así se desprende dos datos actualizados na mañá deste martes pola Consellería de Sanidade na súa web con cifras ata as 18,00 horas deste luns, nos que se constata que os contaxios confirmados por PCR nas últimas 24 horas ascenden a 116 na área sanitaria de Vigo; a 66 na da Coruña; 42 na de Lugo; 41 na de Pontevedra; 34 na de Ourense; 31 na de Santiago; e 20 na de Ferrol.
Así pois, Vigo atópase este martes cun total de 2.455 persoas contaxiadas –14 menos ca no día anterior–.
En canto ás persoas con Covid falecidas, aumentaron a 1.009, tras notificar Sanidade 21 mortes na tarde deste luns en toda Galicia, oito delas na área de Vigo.
