A Comisión Nacional dos Mercados e a Competencia (CNMC) emitiu un informe no que determina que a concesión dunha subvención de case 430.000 euros á empresa que explota o Auditorio Mar de Vigo e que organizou o festival Terraceo non respectou os principios de libre concorrencia e non discriminación.

O informe, con data 28 de outubro de 2020, ditouse tras unha reclamación presentada pola Asociación de Produtores Técnicos de Espectáculos de Galicia (APTEGA), en relación á resolución dunha convocatoria de axudas públicas para a realización de actividades socioculturais no Auditorio Mar de Vigo da cidade olívica.

Dita Asociación pedía que se investigase a concesión das axudas de forma exclusiva á empresa Organización de Ideas de Éxito, que xestiona e explota o Auditorio en virtude dun contrato privado co Concello.

Segundo a resolución da CNMC, a pesar de que a convocatoria de subvencións debe observar os principios de concorrencia competitividade, publicidade, transparencia, obxectividade, igualdade e non discriminación, o Concello olívico outorgou o importe íntegro das subvencións a un só solicitante, “sen ofrecer unha xustificación obxectiva e razoable”.

Por outra banda, a Comisión tamén incide en que as bases da convocatoria van contra a normativa por, en concreto, contemplar a esixencia aos solicitantes de ter sede en Vigo. A ese respecto, lembrou que é numerosa a xurisprudencia que establece que esa esixencia pode ser discriminatoria con respecto a empresas que teñan sede noutros territorios e que queiran concorrer no proceso.

Ademais, a CNMC sinala que o Concello tamén pide que as empresas solicitantes dispoñan de persoal de organización e un local fixo onde desenvolvan as súas actividades, así como acreditación de experiencia. Estas condicións, xunto co requisito de ter sede en Vigo e o feito de que Organización de Ideas de Éxito xa explote o Auditorio, sitúana nunha “posición moi vantaxosa” con respecto a posibles competidores nese concurso, segundo a Comisión.