A Policía Local de Vigo denunciou nas últimas horas a dous condutores, que estiveron implicados en incidentes de tráfico, e que, nun caso, cuadriplicaba a taxa de alcoholemia, mentres que, no outro, deu positivo en cocaína. Segundo informaron fontes policiais, na madrugada deste luns, unha dotación do 092 deu o alto a un condutor despois de cometer unha infracción de tráfico no Camiño Roseira Redomeira.

Ao identificar a este home, de 48 anos de idade, os axentes comprobaron que presentaba síntomas de atoparse baixo os efectos do alcol, polo que lle realizaron a proba. O test arroxou un resultado de 1,09 e 1,03 mg/l, o que supón máis de catro veces a taxa máxima permitida, polo que foi denunciado por un delito contra a seguridade viaria.

Por outra banda, a Policía Local de Vigo tamén identificou a outro condutor na tarde do luns. Tratábase dun home de 33 anos de idade que impactara co seu coche contra un portalón na rúa Cañiza.

Ao ser sometido ao test indiciario de detección de drogas na saliva, este deu resultado positivo para cocaína, polo que foi denunciado administrativamente e enfróntase a unha sanción de ata 1.000 euros e a perda de 6 puntos do seu carné de conducir.