O Concello de Vigo expuxo cubrir o espazo do que dispón Adif nunha chaira situada xunto á rúa García Barbón e o nó de Isaac Peral para acoller instalacións deportivas. O alcalde, Abel Caballero, indicou que esta proposta foi trasladada nunha reunión celebrada este luns con representantes da Zona Franca, que se prevé que participe no financiamento, e Adif.
Durante o encontro, a presidenta do administrador ferroviario, Isabel Pardo de Vera, valorou esta iniciativa, segundo indicou o rexedor, quen explicou que se contempla instalar unha cuberta na chaira para permitir que o Porto e Adif poidan utilizar a parte inferior.
En concreto, Abel Caballero precisou que no espazo do que dispón de Adif na chaira xunto a Isaac Peral atópanse “algún tren”, “aparcadoiros de camións” e o edificio desta entidade na cidade, así como que o Porto non utiliza a zona.
Mentres, concretou que se avogou por que a parte superior acolla un campo de fúbtol, entre outras instalacións deportivas. Precisamente, o alcalde lembrou que a proposta inicial do Concello pasaba por solicitar a cesión da parte do terreo que corresponde a Adif, pero apuntou que se modificou para dispor de máis espazo.
CONTACTO CON ADMINISTRACIÓNS
Ademais, Abel Caballero avanzou que se porá en contacto co Ministerio de Transportes, Mobilidade e Axenda Urbana para abordar a utilización desa zona con fins deportivos e detallou que a actuación tamén deberá exporse á Presidencia do Porto de Vigo e outras entidades.
Así mesmo, explicou que Zona Franca se encargará da cuberta, que comparou co espazo que se situará sobre o centro Vialia. Ademais, sinalou que esta institución, que aceptou a proposta, permitirá que a parte de abaixo sexa de utilización de Adif e o Porto.
Por outra banda, a presidenta de Adif valorou o encontro, no que precisou que se avanzou “en sintonía” co proxecto de cidade do Concello “para analizar varias cuestións na interaccion de ferrocarril e cidade”
Así, Isabel Pardo de Vera apuntou que se marcaron as liñas que se definirán entre administracións e axentes implicados para alcanzar solucións que ten en marcha o proxecto ferroviario e en sintonía con “toda a loxística portuaria”.
