Axentes da Policía Local de Vigo detiveron este xoves a un home de 67 anos de idade, A.R.L.S., de Barcelona, como presunto autor dun delito de atentado contra a autoridade, por atacar aos policías que o identificaron por non levar máscara.

Os feitos ocorreron a pasada madrugada no Casco Vello da cidade, cando unha dotación do 092 estaba a facer labores de vixilancia e control do uso de máscaras debido á pandemia de coronavirus.

Os axentes detectaron a un home sen levar esa medida de protección e, aínda que o apercibiron, o home negouse a porse a máscara e mostrou unha actitude hostil.

Ao ser preguntado, o home asegurou que non se puña a máscara porque é hipertenso, e os axentes replicáronlle que, de ser certo, é unha persoa vulnerable e, con máis motivo, debe estar protexido.

Como o home mantivo a súa actitude, os axentes reclamáronlle a súa documentación e informáronlle de que sería proposto para sanción. Nese momento, o sexaxenario encarouse cos policías e, sen respectar a distancia de seguridade, achegouse a un deles e tentou propinarlle dúas cotenadas, polo que tivo que ser reducido e detido.