O responsable comarcal de Galiza Nova en Vigo, Brais Ruanova, chamou a apostar por unha “república galega” ante unha monarquía con “personaxes ligados á corrupción”.
Antes de participar nun acto simbólico celebrado este luns en Vigo para censurar a monarquía, Ruanova asegurou que esta representa unha “institución anacrónica” que conta con “personaxes” como Juan Carlos de Borbón, que afirmou que se atopa “ligado á corrupción”.
Deste xeito, apelou a “acabar coa monarquía”, respecto de cuxos “idearios” resaltou que a mocidade galega está “moi afastada”.
Así mesmo, Brais Ruanova presentou unha campaña posta en marcha por Galiza Nova a nivel galego para censurar a monarquía e ao rei emérito ante as informacións que apuntan a unha posible relación deste último “con temas de corrupción e diñeiro”.
Para iso, Galiza Nova realizou un acto simbólico durante o que varios mozos colocaron maletas repletas de fotocopias de billetes de 500 euros ante o busto de Juan Calos I, situado no Concello, tras o que levantaron unha pancarta que rezaba “Galicia non ten rei”.
Adicionalmente, o responsable comarcal da organización xuvenil lembrou que o edil do BNG na corporación municipal, Xabier Pérez Igrexas, reclamou a retirada do busto e o cambio de nome da Praza do Rei, situada ante o edificio consistorial.
