A Deputación de Pontevedra e a Universidade de Vigo (UVigo) impulsarán o estudo da posición das mulleres en áreas relacionas coa ciencia, a tecnoloxía, as matemáticas e a enxeñaría, así como na innovación e a dixitalización.

En concreto, esta iniciativa representa o principal obxectivo da Cátedra de Feminismos 4.0, para cuxa realización asinaron un convenio a presidenta da Deputación Provincial, Carmela Silva, e o reitor da universidade, Manuel Reigosa, este venres en Vigo.

Neste contexto, Carmela Silva advertiu da baixa presenza das mulleres en áreas ligadas á innovación e a tecnoloxía e advertiu da necesidade de “tomar conciencia da situación”. Así, incidiu en que as mulleres deben adoptar un “papel” relevante no proceso da dixitalización, así como en que resulta preciso visibilizar o traballo das investigadoras e a súa produción científica.

Así mesmo, o reitor asegurou que o feito de que o 52% da poboación non estea presente en áreas tecnolóxicas leva unha “perda do talento” feminino e chamou traballar para evitar “dar un paso atrás” en materia de igualdade.

Nesta liña, Manuel Reigosa resaltou a importancia de que os estudantes da universidade “saian das aulas con conciencia de que a sociedade ten que ser feminista”, para o que chamou a potenciar a igualdade a través da docencia, a investigación e a divulgación. Do mesmo xeito, afirmou que a cátedra permitirá que a universidade cre “conciencia e coñecemento do camiño que queda por percorrer”.

ACTIVIDADES

Adicionalmente, Carmela Silva destacou que a Cátedra de Feminismos 4.0 de 2020 inclúe máis actividades que a desenvolvida o ano anterior. En concreto, en outubro celebrarase o segundo seminario virtual ‘Sociedade dixital e xénero: hackeando o patriarcado’, que constará de dúas conferencias, unha mesa redonda e dous talleres (‘Wikimaratón feminista’ e ‘Taller virtual para identificar e combater machitroles. STOP Machitroles’).

Tamén se impulsarán axudas a investigacións relacionadas coa igualdade a través de bolsas de ata 6.000 euros e convocaranse os premios GeekGirlsCovid. Ademais, crearanse un comité de sabias para vibilizar o papel da muller no coñecemento e espazos da cátedra nas páxinas web de ambas as institucións. Do mesmo xeito, difundiranse cuestións de actualidade e a produción científica ligada ao proxecto.