Identificado tras ser expulsado do Hospital Álvaro Cunqueiro e provocar un incendio no exterior

Pouco antes protagonizara un altercado no hospital que motivou a súa expulsión do mesmo.

Hospital Álvaro Cunqueiro dende a parroquia de Valadares / © Miguel Núñez.

Un home de 44 anos domiciliado en Vigo, D.C.S., foi identificado tras ser expulsado do Hospital Álvaro Cunqueiro da cidade por protagonizar un altercado e provocar un incendio nunha zona axardinada situada no exterior do mesmo.

En concreto, sobre as 13,34 horas deste sábado, persoal de seguridade do centro hospitalario alertou dun incendio á Policía Local, tal e como trasladou a mesma.

Ademais, os vixiantes indicaron que retiveran o presunto autor do lume e solicitaron a presenza dunha patrulla de Policía. Tamén explicaron que xa informaran ao servizo de extinción de incendios da presenza das chamas.

Unha vez no lugar, os axentes identificaron o home e descubriron que pouco antes protagonizara un altercado no hospital que motivou a súa expulsión do mesmo por parte do persoal de seguridade. Posteriormente, nun arrebato, este home plantou lume a unha zona axardinada do exterior do centro.