A xunta de goberno local do Concello de Vigo deu luz verde ao expediente de contratación da reforma da bancada de Marcador, no estadio municipal Abanca Balaídos, por un importe de 16,6 millóns de euros que serán financiados polo Concello e pola Deputación de Pontevedra.

Así o anunciou este xoves en rolda de prensa o alcalde da cidade, Abel Caballero, quen explicou que a previsión do goberno local é que a obra poida adxudicarse en novembro.

A actuación contempla, ademais da reforma da zona de bancada (onde se instalarán 6.418 butacas), a construción de 8 ascensores, a renovación da iluminación, novos baños e outros servizos. O prazo de execución dos traballos é de 18 meses.

O alcalde destacou, tras anunciar esta obra, a “negativa total” da Xunta a achegar financiamento para a reforma do estadio municipal. “Non pon nin un só céntimo. Agora, ao palco veñen encantados”, censurou Abel Caballero.