O estaleiro vigués Metalships & Docks anunciou este sábado a posta en marcha dun “gran centro de reparación naval” nas súas instalacións de Teis, na ría de Vigo, que poderá acoller buques de ata 180 metros de eslora e 10.000 toneladas de peso en varada.
Nun comunicado, a empresa informou de que adquiriu un novo dique, construíu instalacións auxiliares e dispón de 700 metros lineais para reparacións á boia, para o que fixo un investimento de 10 millóns de euros. Isto, agregou, “permitirá ao estaleiro competir no mercado internacional” das reparacións navais de buques grandes, “un mercado con expectativas de estabilidade nos próximos anos”.
A reparación é “unha parte relevante” da carteira de pedidos actual do estaleiro, que seguiu traballando nestas actividades durante o confinamento, con momentos nos que houbo máis de 600 traballadores diarios, indicou a empresa.
Este novo centro permitirá atender a demanda existente á que non se está dando resposta en Vigo, dado que as instalacións contarán co calado necesario e diques flotantes (só hai un dique na actualidade) para acoller a “case todos os buques” que atracan en Vigo e en portos próximos.
Evitarase, así, que os de gran eslora teñan que ir a Ferrol ou a Portugal. A empresa explicou que na actualidade as embarcacións se poden construír e botar nos estaleiros locais, pero “non dispoñen de medios para efectuar a necesaria varada preentrega”.
Metalships defendeu que esta mellora dos medios “afectará de maneira positiva ao sector naval” de toda a ría de Vigo e ás auxiliares, posto que actualiza unha actividade de reparación que estaba “obsoleta, desfasada e, nalgúns casos, con escasas posibilidades de supervivencia”.
CARGA DE TRABALLO PARA AS AUXILIARES
Estas novas instalacións son unha “garantía de carga de traballo” para “unha numerosa industria auxiliar”, que terá “potencial para operar máis aló da súa actual ocupación”, engadiu a empresa, que apuntou tamén a unha “estabilización notable” dos altibaixos no negocio, que se pode aproveitar para mellorar os resultados.
A nota sinala tamén que se amplían as garantías de continuidade nun “sector moi importante da ría de Vigo” e que, en termos de emprego, dado que a reparación é “intensiva” en man de obra, poderanse xerar ao redor dun millón de horas ao ano. Unha potente industria de reparación, subliñou, cumprirá a dobre función de “colaborar no mantemento do emprego” e impedir a perda do ‘know how’.
A HISTORIA DO PROXECTO
O presidente de Metalships e do Grupo Rodman, Manuel Rodríguez, afirmou que este centro de reparación “era un obxectivo desexado desde hai décadas” en Vigo e lembrou que en 2006 un grupo de estaleiros e empresas auxiliares crearon unha sociedade para a súa construción. Metalships foi un dos impulsores, pero o proxecto non se concretou.
En 2011 Metalships decidiuse a emprender en solitario a iniciativa como proxecto industrial asociado ao concurso eólico e investiu entón 12 millóns de euros para adquirir terreos: os activos de Varaderos Pérez Méndez, incluída a concesión da autoridade portuaria, a nave da antiga fábrica de conservas Núñez Rey e a concesión e parte do equipo do estaleiro M. Cíes. Construíronse, ademais, dous novos diques duns 1.700 metros cadrados cada un e dragáronse uns 6.000 metros na lámina de auga.
No entanto, agregou a compañía no seu comunicado, a crise económica e non poder desenvolver o proxecto eólico que se aprobou “por dificultades ambientais“, levaron a suspender o proxecto.
POSICIÓN ESTRATÉXICA DE VIGO
A empresa resaltou Vigo ten unha “posición estratéxica” e un intenso tráfico marítimo de mercadorías, polo que o estaleiro se sitúa nunha “posición de referencia” para a reparación naval dos buques que importan materias primas ou exportan produtos terminados.
Vigo e Galicia, engadiu, teñen un tecido empresarial auxiliar “fortemente competitivo e experto”. Metalships manifestou que este será un “proxecto emblemático” desde o punto de vista empresarial, pero tamén no que respecta ao impacto no tecido industrial.
