A Audiencia Provincial da Coruña ditou un auto no que desestima a apelación interposta polo Parlamento de Galicia contra un auto previo do xulgado de instrución de Santiago, que ratificaba o arquivo das actuacións contra un funcionario de Vigo, procesado por non comparecer na comisión de investigación posta en marcha con motivo do accidente ocorrido en agosto de 2018 no festival O Marisquiño.

Por esa incomparecencia, a Fiscalía presentou denuncia contra ese funcionario, o secretario municipal, por un suposto delito de desobediencia, pero o xulgado de instrución arquivou a causa ao entender que o funcionario non actuou con dolo e argumentou a súa decisión.

O Parlamento recorreu o arquivo e o seu recurso de reforma foi desestimado, polo que presentou recurso de apelación ante a Audiencia Provincial da Coruña, que agora tamén o desestimou.

Neste caso, o tribunal provincial fai constar como argumento para rexeitar o recurso que, en primeiro lugar, o investigado “non se limitou, sen máis, a non atender os requirimentos” de comparecer na comisión, senón que “contestou expresamente” e alegou as explicacións que considerou oportunas (e que a Audiencia non analiza).

En segundo lugar, expón a Audiencia, o Parlamento non procedeu conforme se establece no seu regulamento, onde se recolle que se un funcionario citado non comparece, o presidente da Cámara “comunicarao á autoridade ou ao funcionario superior correspondente por se fose procedente esixirlles algunha responsabilidade”.

Este paso non se deu por parte do Parlamento, que acudiu directamente á vía penal “sen considerar efectuar aquela comunicación”, polo que se acordou a desestimación.

VALORACIÓN DE ABEL CABALLERO

A pesar de que a Audiencia non se pronuncia sobre a procedencia ou non de que o secretario municipal comparecese na comisión de investigación do Marisquiño, o alcalde de Vigo, Abel Caballero, valorou o auto como un “pau” ao presidente da Xunta, Alberto Núñez Feijóo, ao que acusa de promover esa comisión “política e espúrea” para prexudicar o goberno vigués.

Segundo interpretou o rexedor, cando se creou a comisión cometeuse unha “grave usurpación de funcións do Concello” olívico, a institución que estaría facultada para indagar sobre o accidente (a pesar diso, no seu día o goberno local opúxose a crear unha comisión municipal porque non había “nada que investigar” no ámbito político e o ocorrido era xa obxecto de procedemento xudicial).

Caballero defendeu que o secretario municipal non comparecese na comisión do Parlamento e criticou a “ousadía” da Cámara por denuncialo. “Agora o xuíz e o fiscal coinciden en que non foi un acto de rebeldía, senón que estaba xustificado polas normas”, afirmou, e denunciou que se tentou “presionar e coaccionar” ao secretario municipal.

Para o alcalde, a Audiencia “avala” esa actuación do funcionario e, ademais, lembrou que hai un ditame do Consello de Estado que referenda que “as comisións dos parlamentos non poden tratar temas municipais”. “Isto é un gravísimo pau a Feijóo, censurado polo Consello de Estado e polos tribunais, e aínda se presenta ás eleccións”, proclamou.