A Xunta de Galicia e o Porto de Vigo anunciaron este mércores o envío do informe sobre a saída sur ferroviaria da cidade olívica e a conexión por tren da terminal portuaria de Bouzas ao Ministerio de Transportes, Mobilidade e Axenda Urbana, ao que instaron a impulsar esta infraestrutura, que permitirá aumentar o tráfico portuario nun 6 %.
A conselleira de Infraestruturas e Mobilidade, Ethel Vázquez, mantivo un encontro de traballo este mércores con representantes portuarios, encabezados polo presidente do Porto de Vigo, Enrique López Veiga, tras o que volveu urxir a construción desa saída sur, con cargo a fondos da UE (Mecanismo Conectar Europa). “Estamos en tempo de desconto”, advertiu.
Ethel Vázquez insistiu novamente na importancia de que o porto conte con esa infraestrutura e coa conexión ferroviaria na terminal de Bouzas, e recalcou que o custo das actuacións, case 500 millóns de euros, está “xustificado” polo “enorme rendemento” que terá.
Na mesma liña, o presidente da Autoridade Portuaria olívica, Enrique López Veiga, sinalou que o Porto de Vigo leva anos demandando esa actuación e que, de feito, en maio de 2019 houbo unha reunión con Adif na que o administrador ferroviario “dixo que ía facer o estudo informativo”. “Pero o estudo non está feito”, constatou.
Segundo afirmou, o Porto “pode ir tirando uns anos máis”, pero o transporte marítimo “necesita un compoñente grande de intermodalidade”. “Xa non hai escusas (…), non se pode perder máis tempo. Galicia non pode esperar máis, e Vigo moito menos”, aseverou López Veiga.
ACCESOS Á ESTACIÓN DE URZÁIZ
Por outra banda, e a preguntas dos medios, a conselleira referiuse á construción dos accesos á nova estación do AVE en Urzáiz, e sinalou que, a pesar das manifestacións da presidenta de Adif ou do alcalde de Vigo, aínda non se aprobou a ‘addenda’ ao convenio para esa actuación.
“Cada vez estamos máis preocupados pola prolongación deste bloqueo indefinido, levamos desde marzo esperando a firma da ‘addenda’, e non chega”, lamentou Ethel Vázquez, quen insistiu en que esta circunstancia entorpece as obras da terminal de buses que executa a Xunta e atrasará a posta en marcha do Centro Vialia.
Así mesmo, a responsable de Infraestruturas e Mobilidade do goberno galego recalcou que a Xunta tampouco ten “información certeira” sobre a chegada do AVE, que leva un “atraso acumulado”.
