InicioSociedadeVarios galegos publican a primeira investigación para previr contaxios en socorristas

Varios galegos publican a primeira investigación para previr contaxios en socorristas

Recomendan incrementar a distancia de seguridade nas praias debido ao vento.

PUBLICADO O

Investigadores das universidades de Vigo, A Coruña, Santiago de Compostela e Barcelona publicaron o primeiro artigo científico a nivel internacional sobre saúde laboral e prevención de contaxios de COVID-19 en socorristas.

Segundo trasladou a Universidade de Vigo (UVigo) nun comunicado, a elaboración do documento contou tamén coa colaboración de expertos de servizos de emerxencias e a Sociedade Brasileira de Salvamento Acuático.

O artigo foi publicado esta semana pola Revista Española de Saúde Pública, editada polo Ministerio de Sanidade. Así, búscase establecer pautas que permitan reducir o risco de contaxio neste colectivo ante a dificultade de manter a distancia de seguridade na maior parte dos rescates acuáticos, que levan secreccións respiratorias que tamén incrementan o risco de contaxio.

Deste xeito, analizáronse os rescates acuáticos e propúxose adaptar o algoritmo de soporte vital básico do Consello Europeo de Resucitación. En concreto, chamouse a priorizar as ventilacións de rescate ante un afogamento e indicouse a necesidade de que estas manobras se realicen cun balón resucitador, filtro HEPA e un Equipo de protección Individual (EPI) antes de comezar as compresións.

Tamén se incidiu en que, nun primeiro momento, débese realizar unha valoración do estado da vítima a distancia e a barlovento da mesma. Ademais, sinalouse que as compresións deberán ser realizadas por dous socorristas e que estes deberán portar máscaras para evitar un incremento do risco de contaxio.

Respecto dos rescates na auga, desaconselláronse os realizados corpo a corpo e remarcouse que, se resulta preciso intervir no mar, as actuacións realizadas en embarcacións ou motos acuáticas deberían ser preferentes. Así mesmo, precisouse que os rescates que poidan realizarse mediante a achega de elementos de flotación desde fóra da auga con ‘drones’ levarán un baixo risco de contaxio.

O responsable do grupo Remoss da Facultade de Ciencias da Educación e do Deporte e autor principal do artigo, Roberto Barcala, explicou que a súa elaboración se realizou a partir de estudos científicos previos e con consenso de expertos dado que o contaxio da COVID-19 representa “unha situación nova”. Así, indicou que se actualizou o documento ‘Servizos de socorrismo: adaptacións en prevención, rescate e primeiros auxilios fronte a COVID-19’, realizado con anterioridade.

DISTANCIA NAS PRAIAS

Adicionalmente, o artigo publicado esta semana recomenda incrementar a distancia de seguridade nas praias con gran afluencia debido ao vento que se adoita presentar nelas. De feito, un estudo da Universidade de Nicosia (Chipre) mostrou que, con ventos de 4 quilómetros por hora, as pingas de saliva poden percorrer ata seis metros cada cinco segundos.

ÚLTIMAS

Abel Caballero celebrará un pleno extraordinario contra o “veto por ideoloxía” a varias relatoras nun programa da Deputación

O alcalde de Vigo, Abel Caballero, anunciou este venres que a próxima semana convocará un...

A Xunta Electoral arquiva unha denuncia do PP por declaracións de Hereu na súa visita a Redondela e Vigo

A Xunta Electoral de Galicia decretou o arquivo dunha denuncia formulada polo PPdeG en...

O Porto de Vigo pecha xaneiro como líder nacional en movemento de vehículos, con 55.801 unidades

O Porto de Vigo pechou xaneiro deste ano arrebatando o liderado en movemento de vehículos á...

O cadáver da muller achada nunha maleta presenta unha puñalada e aínda non puido ser identificada

A autopsia realizada ao cadáver da muller achada dentro dunha maleta nunha leira abandonada...