Profesionais sanitarios reflexionaron sobre a posibilidade de, superada a fase crítica da pandemia por coronavirus, implantar “un modelo mixto” entre telemedicina e consultas presenciais na atención a pacientes hepáticos.
Segundo Ignacio Martín-Sarabia, doutor do Hospital Universitario Álvaro Cunqueiro de Vigo, “ao comezo da crise sanitaria, os pacientes estaban moi satisfeitos coa telemedicina, xa que así evitaban as visitas ao hospital, onde había moitas persoas ingresadas por COVID-19”.
“Pero, nestes momentos, están a demandar volver realizar as consultas presenciais co seu médico“, explicou na xornada sobre o ‘Impacto da pandemia COVID-19 en enfermidades hepáticas en Galicia’, organizada pola compañía de investigación biofarmacéutica Gilead.
“Esta semana estamos a retomar a actividade de visitas de pacientes da forma convencional e estamos a reflexionar sobre a posibilidade de implantar, de agora en diante, un modelo mixto entre ambas”, indicou Martín-Sarabia, encargado de moderar a xornada.
A referida xornada versou sobre como se viron afectados os circuítos de manexo dos pacientes con enfermidades hepáticas durante esta crise sanitaria, así como as novas formas de asistencia establecidas para mellorar a relación entre estes e os profesionais sanitarios.
ABORDAXE DE TRANSPLANTES
Outro dos temas que se trataron na xornada é a abordaxe dos transplantes hepáticos en tempos de COVID-19. Os expertos explicaron que estas prácticas se cancelaron nos peores momentos da crise sanitaria, pero están a volverse a retomar debido a que as UCI se liberaron.
Martín-Sarabia explicou que, grazas á telefarmacia, as persoas coa enfermidade controlada recibiron os fármacos necesarios para tres ou catro meses. Con todo, no caso de pacientes novos que non estaban graves, para evitar riscos innecesarios, preferiuse esperar a comezar o tratamento a partir deste mes de xuño.
A xornada ‘Impacto da pandemia COVID-19 en enfermidades hepáticas’ contou, ademais de con Ignacio Martín-Sarabia, con Pilar Vázquez, do Complexo Hospitalario Universitario da Coruña; con Esther Molina, Antonio Aguilera e Pedro Suárez, todos eles do Complexo Hospitalario Universitario de Santiago de Compostela; e Gerardo Flórez, da Unidade de Condutas Adictivas de Ourense.
Desde a implementación do Plan Estratéxico para a Abordaxe da Hepatite C, tratáronse máis de 130.000 pacientes en España. Con todo, a Asociación Española para o Estudo do Fígado (AEEH) estima que na poboación xeral que acode á Atención Primaria hai aínda 76.500 persoas co virus, pendentes de ser diagnosticadas.
