A Consellería de Medio Ambiente, Territorio e Vivenda iniciou a tramitación ambiental do futuro Plan Xeral de Ordenación Municipal (PXOM) de Vigo.

Segundo precisou a Consellería nun comunicado, a Dirección Xeral de Calidade Ambiental e Cambio Climático publicou a documentación do proxecto na páxina web de Avaliación Ambiental Estratéxica.

Precisamente, o Concello de Vigo remitiu o Documento Inicial Estratéxico e Borrador do plan e as emendas de documentación sinaladas pola Dirección Xeral de Urbanismo, polo que durante dous meses permanecerá aberto o prazo de consultas previas.

Posteriormente, terá lugar a aprobación inicial do plan de urbanismo por parte do Concello e o seu sometemento a información pública e informe sectorial das administracións públicas afectadas. Precisamente, o goberno local prevé que a aprobación inicial da PXOM se realice no primeiro trimestre de 2021 e, a definitiva, en 2023.

Tras o período de información pública e a integración do seu resultado, o Concello deberá solicitar a emisión da Declaración Ambiental Estratéxica, o que permitirá finalizar o támite ambiental iniciado este luns, antes de realizar a aprobación provisional da PXOM.

LEI DO CHAN DE GALICIA

Adicionalmente, a Consellería de Medio Ambiente, Territorio e Vivenda lembrou que a Lei do chan de Galicia fixa medidas que permiten axilizar a tramitación de normas urbanísticas, como o informe único e o prazo máximo de tres meses, para o que opera o principio de silencio positivo.

Ademais, remarcou que o urbanismo é competencia municipal, polo que os promotores destas iniciativas deben ser os concellos. Con todo, destacou que o Goberno galego sustenta de modo económico e técnico os traballos destas administracións para iniciar, avanzar e concluír a tramitación dos plans urbanísticos.

Tamén apuntou que, tras a anulación da PXOM de 2008 da cidade olívica por sentenza, a Xunta “traballou para dar unha solución á situación urbanística de Vigo”, para a que incidiu en que a única resposta debe pasar pola aprobación dun novo plan.

Por este motivo, a Consellería lembrou que “tendeu a man” ao goberno local vigués mediante un convenio de colaboración para a redacción do plan que fixa a achega autonómica en máis de 1 millón de euros.