O alcalde de Vigo, Abel Caballero, transmitiu este martes o seu “desexo absoluto de cooperación” coa Universidade, e prometeu buscar fórmulas para “desbloquear” a débeda que a institución ten co Concello (polo pago do IBI) e tamén melloras no servizo de bus que conecta o centro urbano co campus.
Así o manifestou o rexedor após manter o primeiro encontro formal co novo reitor da UVigo, Manuel Reigosa, que tomou posesión do seu cargo o pasado venres, en substitución de Salustiano Mato.
Após o encontro, Caballero expresou a súa vontade de chegar a acordos co novo equipo de goberno da Universidade e colaborar “en todo aquilo que sexa posible”, porque a institución académica “é un dos elementos centrais da cidade”.
Nesa liña, o alcalde avanzou que buscará “a fórmula para desbloquear a débeda da Universidade co Concello”, e que o consistorio tamén quere “cooperar en proxectos de investigación”, como xa se está facendo no marco da candidatura de Cíes a Patrimonio da Humanidade.
MELLORA DO TRANSPORTE
Por outra banda, asumiu a demanda do reitor de mellorar a conexión de bus urbano co campus, para que o transporte “sexa moito máis rápido, porque tarda moito tempo”. “Comprométome a que, na seguinte concesión (que sairá o ano próximo), faremos unha formulación para que o servizo sexa moito máis fluído e máis rápido”, engadiu.
Pola súa banda, o reitor celebrou que hai “sintonía plena” co alcalde, xa que os dous queren “construír unha mellor universidade”. Este acordo, engadiu, “é moi importante” e augurou que a relación terá un “bo futuro”, á vez que incidiu no seu desexo de que a UVigo estea “máis involucrada e teña máis presenza na cidade”.
