A Unidade de Cultura Científica (UCC) da delegación do Consello Superior de Investigacións Científicas en Galicia puxo en marcha a iniciativa “Pílulas CSIC de coñecemento”, para divulgar a través de redes sociais, en clave de humor, contidos científicos sinxelos e rigorosos.
Así, segundo trasladou o delegado institucional do CSIC en Galicia, Antonio de Ron, fomentan o achegamento á sociedade e, no actual contexto de crise sanitaria, contribúen a “relaxar” e servir de “evasión” á xente que está confinada.
Segundo explicou Luisa Martínez, responsable da Unidade de Cultura Científica, “a idea xurdiu ante a necesidade, no contexto actual, de deseñar un recurso diferente para continuar o labor da UCC a través das súas propias institucións, e tamén por medio das redes sociais, e que ao mesmo tempo axude á sociedade a soportar estes momentos de confinamento”.
As “pílulas” son breves pezas audiovisuais interpretadas polo cómico e actor Carlos Godoy e emítense na canle de Youtube da UCC do CSIC en Galicia, e tamén se difunden en Facebook e en Twitter.
Esas pezas (de momento hai 7 dispoñibles), que se estrean cada luns, mércores e venres, abordan cuestións como a circulación oceánica e o clima en Galicia, a fitorremediación, as leguminosas, os monumentos megalíticos ou a supercomputación.
OUTRAS CAMPAÑAS
Así mesmo, o Instituto de Investigacións Mariñas iniciou este luns nas súas redes sociais unha campaña dirixida a escolares que ten como base o recurso educativo ‘A Ciencia do Mexillón’, publicado en 2010 no marco do proxecto Divulgamar, e estrutúrase en retos semanais.
Esta campaña súmase a outras dúas que xa están en marcha: #QuedaNacasa, que ofrece recursos educativos relacionados coas ciencias mariñas; e #ACienciaResponde, que ofrece coñecemento científico para resolver dúbidas do público xeral.
INICIATIVAS DE AFUNDACIÓN
Por outra banda, a Obra Social de Abanca continúa coa súa iniciativa Afundación en casa, coa celebración de talleres e outras actividades.
Segundo informou a institución, este martes celebrarase, na sección ‘Educación en casa’, o taller ‘A arte como recurso de aprendizaxe. Poesía desde o confinamento’. Trátase dunha proposta dirixida por Laura Sarasola e enfocada especialmente aos docentes.
Do mesmo xeito, no portal web de Afundación en casa, iniciarase este martes un taller semanal de artes plásticas para os máis pequenos. Esta semana, a sesión explicará o estampado con cola e especias.
Finalmente, e nos directos de Afundación TV, o portal web ofrecerá este martes a partir das 17,00 horas dúas novas charlas da sección ‘Abanca e IESIDE asesoran’. En primeiro lugar, o profesor do Executive MBA, Ignacio Martín Maruri, falará de ‘Teletrabajo en equipo en tempos de illamento: un desafío múltiple’; mentres que o xerente da empresa Don Disfrace, Roberto Domínguez, impartirá un relatorio titulado ‘CEO Talks. Tenda en liña’.
