A Policía Local de Vigo propuxo para sanción a 39 persoas por incumprir o confinamento entre este mércores e este xoves, o que eleva o total de multas cursadas desde a entrada en vigor do estado de alarma a 1.142.

Así o detallou nunha rolda de prensa realizada este venres por videoconferencia o alcalde, Abel Caballero, quen destacou o descenso rexistrado no número de sancións diarias impostas. A este respecto, concretou que os axentes realizaron un milleiro de controis durante estes dous últimos días.

Deste xeito, o alcalde indicou que os policías locais localizaron a tres persoas que paseaban pola rúa e descubriron dúas festas realizadas en domicilios particulares, a unha persoa ebria e a un mozo que se desprazou nun taxi para visitar á súa parella. Tamén apuntou que se revisaron os precintos dos areais da cidade.

Así mesmo, o rexedor indicou que en xunta de goberno deuse luz verde a un contrato de emerxencia para adquirir xel hidroalcóholico. Tamén indicou que se comprarán dous somieres para os centros habilitados para positivos por COVID-19 e medio centenar de albornoces para persoas sen fogar que se acolleron en distintas instalacións facilitadas polo Concello.

Do mesmo xeito, Abel Caballero precisou que se alugou un camión que dispón dunha cubeta de nove toneladas e dous canóns para lanzar chorros desinfectantes nas zonas rurais.

Por outra banda, explicou que o vindeiro martes a Xerencia Municipal de Urbanismo tomará coñecemento da remisión á Xunta do documento inicial estratéxico do Plan Xeral de Ordenación Municipal (PXOM) para solicitar a súa tramitación e avaliación ambiental. Así, ante as críticas vertidas sobre a súa “ocultación” polos grupos da oposición e a delegada territorial do Goberno galego, Corina Porro, lembrou que foi posto a disposición das demais formacións e a Xunta.