Axentes da Policía Local de Vigo tramitaron denuncia contra un veciño da cidade, P.A.G., de 49 anos de idade, por saltar o confinamento do estado de alarma, conducir baixo os efectos das drogas e causar danos nunha praza pública ao ter un accidente.

Segundo informaron fontes policiais, este home circulaba na mañá deste domingo pola zona de Praza de América a unha velocidade excesiva, polo que perdeu o control do coche e acabou impactando contra unha zona axardinada da praza, causando diversos danos.

Ao lugar desprazouse unha dotación de atestados que, ao identificar o condutor, decatouse de que presentaba síntomas de estar baixo os efectos dalgunha sustancia estupefaciente. Ao realizarlle o test indiciario de drogas, este deu resultado positivo para anfetaminas, opiáceos e cocaína.

Por estes feitos, o home foi denunciado por un delito contra a seguridade viaria, por saltar o confinamento e polos danos que causou na praza.