O Hospital Povisa de Vigo habilitará desde este mércores un sistema para que os contaxiados por coronavirus se poidan comunicar por videoconferencia de modo gratuíto cos seus familiares durante o réxime de illamento.

Segundo detallou o centro nun comunicado, o dispositivo, único en España, estará dispoñible en todas as terminais de cabeceira dos pacientes con COVID-19. En concreto, foi desenvolvido por empregados de servizos técnicos do hospital e un provedor de pantallas táctiles, Quantion.

Deste xeito, búscase que estas persoas poidan realizar chamadas privadas sen límite de tempo de modo individual ou grupal mediante uns dispositivos cuxas últimas probas se levarán a cabo este martes.

Ademais, desde a semana pasada, pacientes con coronavirus gozan do uso de televisores do hospital de modo gratuíto. Así, búscase “compensar” as condicións de illamento ás que se somete a estas persoas e fomentar a comunicación cos seus amigos e familiares.