Unha xestante ingresada no Hospital Álvaro Cunqueiro de Vigo desde hai días, e que deu positivo en Covid-19, deu a luz nas últimas horas a un bebé san, que foi sometido ás probas e que deu negativo en coronavirus.

Así o confirmaron fontes do Sergas, que precisaron que a nai ingresou hai uns días no hospital tras dar positivo na proba do coronavirus. As mesmas fontes indicaron que se lle “reprogramou” o parto e se lle realizou unha cesárea.

O bebé naceu ás 35 semanas de xestación e, aínda que é prematuro e debe someterse ás precaucións debidas por esa condición, está san, xa que as probas do Covid-19 no seu caso deron resultado negativo.

Sanidade trasladou que ambos se atopan “ben” e que, mentres que o recentemente nado permanece ingresado na unidade de Neonatoloxía, a súa nai seguirá tamén o hospital, e “evoluciona favorablemente”.

O caso deste bebé é o primeiro de Galicia dunha xestante afectada polo virus e que dá a luz a un bebé san.