O festival de cultura urbana O Marisquiño celebrará o seu vixésimo aniversario entre o venres 7 e o domingo 9 de agosto na zona portuaria de Vigo.
Tal e como trasladaron os organizadores do evento nun comunicado xa se confirmou. Repítese este ano a celebración das tres copas do mundo de Skate, Basket 3×3 e Dirt Jump, que se disputarán no peirao de transatlánticos, a praza da Estrela e na contorna das Avenidas, respectivamente.
Ademais, levarán a cabo actividades familiares e ampliarase a oferta dirixida ao público infantil no marco do programa OMKIDS do festival de cultura urbana, que comezou o seu percorrido no 2001. A dirección do festival comezou a negociar o apoio público ao evento co Concello de Vigo, a Deputación de Pontevedra, a Xunta de Galicia, o Porto de Vigo e a Zona Franca. Mentres, Super Bock, Red Bull e Nissan exercerán como patrocinadores privados.
A distribución dos espazos no recinto e a programación cultural e deportiva daranse a coñecer nas próximas semanas. Posteriormente, detallarase a definición da estrutura das competicións deportivas.
O Marisquiño, que tamén inclúe disciplinas relacionadas coa cultura urbana, como o break dance, o grafiti e a música; aspira a exercer como un axente de atracción turística para a cidade e a comunidade. Deste modo, busca colaborar na consolidación da cidade como un destino atractivo e familiar.
