O alcalde de Vigo, Abel Caballero, manifestou este martes a súa satisfacción tras a entrevista co ministro de Cultura, José Manuel Rodríguez Uribes, quen, asegurou, lle trasladou “que apoia completamente” a construción dunha Biblioteca do Estado na cidade, e lamentou o atraso de sete anos “por culpa de Rajoy e das presións de Feijóo”.
Nunhas declaracións remitidas aos medios de comunicación, o rexedor olívico recalcou que hai “unanimidade e consenso total” co Ministerio de Cultura, a cuxo responsable trasladou a situación do proxecto e o seu plan para construír un edificio singular nos terreos municipais próximos aos actuais xulgados.
Abel Caballero asegurou que a Biblioteca do Estado xa tiña o visto e prace do goberno central presidido por Rodríguez Zapatero. “Metérono en Orzamentos a instancias miñas; alteraron a lei para que fose posible facer Bibliotecas do Estado en cidades que non fosen capital de provincia, pensando en Vigo, e a petición miña”, lembrou o alcalde.
“Pero cando chegou Feijóo á Xunta, unha das primeiras medidas foi eliminar a Biblioteca dos Orzamentos do Estado”, denunciou, e engadiu que, cando o proxecto se recuperou, con Sánchez en Moncloa, o goberno autonómico foi a Madrid “para anular a Biblioteca de Vigo”.
A pesar de todo, relatou, o goberno local mantén o seu proxecto de que se constrúa ese edificio cultural na parcela traseira dos xulgados, terreo expropiado polo Concello, e “avalado” polo Ministerio.
A partir de agora, indicou, haberá que avaliar se se aplica neses terreos a lei 3/2016 ou se se cambia o seu uso mediante unha modificación puntual da PXOM, como asegurou que se está facendo. “En próximos días”, engadiu, responsables municipais contactarán co secretario xeral do Ministerio e coa Directora Xeral do Libro para avanzar nos trámites.
Finalmente, Abel Caballero lamentou que a Biblioteca do Estado de Vigo acumula “sete anos de atrasos e paralización por culpa de Rajoy e das presións de Feijóo”, e o presidente da Xunta, insistiu, “segue en contra” de que Vigo teña esa infraestrutura cultural.
XUNTA
Respecto diso da reunión do alcalde co ministro Rodríguez Uribes, a Xunta pediu a Abel Caballero “que deixe de facer ‘tournés'” e que ceda a parcela municipal para a construción da Biblioteca.
De feito, a administración autonómica apuntou que xa hai un “compromiso”, desde agosto pasado, entre o goberno galego e o central, “para levala adiante”. Dese modo, o Estado construirá a infraestrutura, e a Xunta encargarase da xestión e mantemento.
