As defensas dos dous investigados nunha das pezas separadas da Operación Patos, por un delito de suborno relacionado co pago de servizos de prostitución a un funcionario vigués, pediron a nulidade deste procedemento xudicial alegando “descontrol absoluto” no mesmo e vulneración de dereitos fundamentais.

A Sala do Civil e o Penal do Tribunal Superior de Xustiza de Galicia (TSXG) acolleu este martes unha vista para resolver o recurso contra o auto da Audiencia Provincial de Pontevedra no que desestimaba as cuestións previas argumentadas polas defensas.

“O proceso debe arquivarse”. Así de tallante pronunciouse un dos letrados da defensa, que pide que esta peza sexa declarada nula en base a que “se solicitou información sen garantir os dereitos” dos investigados. “Non había control sobre a legalidade de escóitalas telefónicas durante todo o procedemento”, alega.

DESESTIMACIÓN DA FISCALÍA

A anulación foi motivo de arquivo en varias pezas e serve de “precedente” ás defensas do funcionario municipal e o empresario da presunta trama para evitar o xuízo por suborno.

Pola súa banda, a Fiscalía solicitou a desestimación destes recursos e pide a confirmación do auto da Audiencia Provincial de Pontevedra. Entre os seus motivos, destaca o feito de que se estea ante un delito de carácter continuado.

Neste procedemento, a Fiscalía pide un ano de prisión para o funcionario do Concello de Vigo, A.C.C., con responsabilidades no departamento de Fomento (Vías e Obras), ao que acusa dun delito continuado de suborno, ao aceptar supostamente servizos de prostitución, pagados por outro acusado, E.A.P., responsable da construtora Eiriña.

PENAS DE PRISIÓN

Segundo o escrito de acusación do Ministerio Público, polo menos en xuño de 2013 e en febreiro de 2014, este funcionario (que será xulgado por un tribunal de xurado) mantivo relacións sexuais con prostitutas, que foran contratadas e pagas por E.A.P. O administrador da construtora, apunta a Fiscalía, efectuou esas “invitacións” ao funcionario en atención ao cargo que desempeñaba no Concello.

De feito, durante a fase de instrución da coñecida como Operación Patos (na que se chegou a investigar a medio centenar de empresarios, políticos e técnicos), o Ministerio Fiscal relacionou eses servizos de prostitución pagados ao funcionario vigués co feito de que A.C.C. interviña na valoración de gran parte das obras ás que concorría a construtora Eiriña.