A maior parte da frota de Galicia permanece este martes pola mañá amarrada a porto a causa do temporal no mar con ondas de máis de cinco metros de altura a causa do paso da borrasca Karine.
Segundo confirmaron a Europa Press fontes de confrarías e lonxas galegas, na provincia de Pontevedra os barcos quedaron en porto en localidades como Baiona, Bueu e Cangas do Morrazo, onde toda a frota permanece amarrada este martes.
Na provincia de Coruña non puideron saír a faenar en zonas como Cariño, Fisterra, Muros e Muxía, mentres que en Laxe acudiron catro embarcacións ao mar.
E na provincia de Lugo, así mesmo, os barcos de pesca non puideron saír a faenar debido ao mal tempo no mar en zonas do litoral como Burela, Celeiro e Ribadeo.
Activado o plan por risco de inundacións pola crecida de caudais
En paralelo a Xunta activou o Plan Especial por Risco de Inundacións de Galicia ( Inungal) ante a subida dos caudais en ríos das concas de Galicia-Costa debido ás choivas asociadas á borrasca Karine.
A Consellería de Infraestruturas e Mobilidade, a través do Organismo Augas de Galicia, informa de que, segundo o sistema Artemis de previsión de avenidas, “espérase un incremento do caudal xeneralizado nas concas de Galicia-Costa“.
Por iso, o 112 incide na importancia de adoptar as “medidas preventivas necesarias” e “alertar ou mobilizar os medios e recursos” oportunos.
