O goberno municipal de Vigo denunciou este mércores que a presidenta do Consorcio Casco Vello (organismo participado nun 90 por cento pola Xunta e nun 10 por cento polo Concello), Corina Porro, propón “regalarlle” á administración autonómica 15 locais deste organismo para que a Xunta, á súa vez, “os doe a algunha institución”.
Así o trasladou o goberno presidido por Abel Caballero a través dun comunicado, no que lembrou que a Xunta “enganou” a Universidade de Vigo asinando un protocolo no que lle ofrece a cesión de locais que non son da súa propiedade, senón do Consorcio.
“Desde o Concello opóñemonos a que o Consorcio, entidade viguesa, lle regale á Xunta locais comerciais no Casco Vello de Vigo”, advertiu o goberno local, que lamentou a “incapacidade” da presidencia do Consorcio (agora ostentada por Corina Porro, e nos últimos anos por Ignacio López-Chaves) para pór no mercado eses locais.
Por todo iso, o goberno vigués anunciou que, na próxima reunión do Consello de Administración do Consorcio, proporá “unha alternativa que evitará a descapitalización” do organismo, e que este poida seguir o seu labor de rehabilitación, “asegurando a utilización de locais por entidades culturais, turísticas e de diferentes ámbitos da cidade”.
Por outra banda, e en relación coa cesión dun local para establecer en Vigo unha sede do Centro Galego de Arte Contemporánea (CGAC), o goberno municipal confirmou que a apoiará, “pero marcará uns prazos para asegurar que esta proposta da Xunta de Galicia se leva adiante”.
En resposta a este comunicado, o portavoz do grupo municipal do PP, Alfonso Marnotes, criticou que o goberno de Abel Caballero, que leva “12 anos sen facer nada polo Casco Vello”, queira agora pór “un pau na roda” desta iniciativa, que beneficiará a entidades sen ánimo de lucro. “É dunha mezquindad e dun oportunismo político que non se poden tolerar”, sentenciou, e engadiu que a proposta da presidencia do Consorcio “ten todos os informes favorables”.
