Así, a portavoz do grupo popular, Elena Muñoz, presentou unha moción na que insta a Fomento a incoar un expediente sancionador á empresa e a tomar medidas para obrigarlle a garantir a seguridade e fluidez do tráfico en Rande.

Así mesmo, reclama a Audasa que culmine as obras pendentes en horario con menor densidade de circulación, que devolva o custo das peaxes pagas polos condutores que quedaron atrapados e que levante as barreiras das cabinas cando haxa colapsos.

Elena Muñoz sinalou que o PP vigués remitiu unha carta á empresa para exporlle as súas reclamacións, sen que a situación mellorase, e recoñeceu como “incuestionable” que hai “atascos sistemáticos e intolerables”.

O pleno do Concello de Vigo aprobou este mércores, en sesión ordinaria, dúas mocións (presentadas por PP e PSOE) nas que instan á concesionaria da AP-9, Audasa, e ás administracións competentes, a tomar medidas ante os continuos colapsos provocados polas obras na ponte de Rande.

A moción foi aprobada cos votos favorables de PP e Marea, e a abstención do PSOE, que non apoiou o acordo ao rexeitar os populares unha emenda encamiñada a esixirlles ao ministro de Fomento e ao presidente da Xunta que “pidan desculpas” aos condutores que sufriron e seguen sufrindo os problemas en Rande.

PROPOSTA DO PSOE

Pola súa banda, o grupo socialista presentou outra moción moi similar, na que reclaman a Xunta e Fomento que se desculpen cos usuarios da autoestrada, e esíxenlle á concesionaria un plan de actuación para previr e minimizar os atascos.

David Regades lamentou que o Goberno non lle esixa á concesionaria que cumpra as súas obrigacións, e criticou que o presidente Feijóo non interveña a pesar de que esta “ultraxe” se vive a diario nunha ponte dunha autoestrada que está en Galicia.

O edil socialista aseverou ademais, que, se a partir do venres o PSOE goberna en España (se consegue apoios á moción de censura contra Rajoy), o novo Executivo “tomará medidas, como retrotraer a subida da peaxe ou levantar as barreiras nos atascos”. Así mesmo, animou aos condutores a gardar os seus recibos da peaxe, convencido de que “a Xustiza lles dará a razón”.

O portavoz de Marea, Rubén Pérez, sinalou que tanto PSOE como PP son “corresponsables” dos problemas en Rande. Os primeiros, polo convenio asinado en época de José Blanco, que permitiu a subida da peaxe vinculada á obra de ampliación de Rande; e os segundos, por vetar a transferencia da AP-9 e non exercer o control sobre a concesionaria. Ao seu xuízo, “a única solución” a estas alturas, é o “rescate” da autoestrada.

A moción do grupo socialista foi aprobada cos votos favorables de PSOE e Marea. O PP, alegando que a iniciativa foi presentada fóra de prazo e estábase vulnerando o regulamento, optou por non intervir no debate e non votar, polo que o alcalde, Abel Caballero, deu por unánime o acordo (ao ser positivos tódolos votos emitidos).