O conselleiro de Economía, Emprego e Industria, Francisco Conde, destacou a capacidade de “transferir coñecemento e xerar valor” dos centros tecnolóxicos e a súa conexión co tecido empresarial.
No marco dunha visita realizada este luns en Vigo a Gradiant, o Centro Tecnolóxico de Comunicacións, o conselleiro sinalou que Galicia se atopa “á vangarda” en distintos aspectos de inovación grazas ao labor desenvolvido por estes centros e a súa participación en proxectos de I+D+i.
Precisamente, o titular autonómico de Industria destacou que a Xunta destina 5 millóns de euros a apoiar o equipamento de centros tecnolóxicos para fortalecelos. Tamén avanzou que visitará os centros que existen en Galicia para avaliar os proxectos que se impulsan nos mesmos e identificar propostas futuras relacionadas co apoio ao I+D+i.
En concreto, Conde resaltou a capacidade de especialización de Gradiant, así como a súa aposta por iniciativas “diferenciadoras”. Deste xeito, lembrou que este centro impulsou unha unidade mixta de ciberseguridade xunto a Telefónica no último ano e que esta permitiu crear o primeiro centro galego enfocado neste ámbito, TEGRA.
COORDINACIÓN DE CENTROS
Adicionalmente, o conselleiro explicou que Gradiant coordina unha rede estatal de centros tecnolóxicos a través do programa Cervera, que impulsa o Goberno central, e que participa en distintas iniciativas relacionadas co 5G.
Así mesmo, Conde apuntou que este centro tecnolóxico colabora cos socios da Xunta no polo aeronáutico de Rozas. Tamén puxo en valor a súa participación en dúas ‘hubs’ de innovación empresarial, que, segundo apuntou, o Goberno galego apoiará mediante axudas por valor de 7 millóns de euros para impulsar proxectos vinculados ás novas tecnoloxías e o tecido produtivo da comunidade.
Ademais, tras unha reunión mantida co conselleiro, o presidente do padroado de Gradiant, Alfredo Ramos, subliñou o traballo levado a cabo polos profesionais deste centro en ámbitos como a conectividade, a intelixencia artificial e a seguridade.
Así, apuntou que, no último ano, reforzáronse o consello empresarial e o padroado de Gradiant para representar o sector TIC galego mediante a incorporación de empresas como Altia, Plexus, Celnex, PSA e Nova Pescanova. Deste xeito, sinalou que se busca situar este centro tecnolóxico nunha posición que lle permita actuar como “catalizador” e “actor” da axenda dixital da Xunta.
