Un accidente con polo menos catro turismos implicados saldouse na mañá deste luns con catro persoas feridas no termo municipal de Vigo.

Segundo informou o 112 Galicia, sobre as 9,30 horas, unha persoa particular alertou ao servizo de emerxencias dunha colisión múltiple por alcance na rotonda do Hospital Álvaro Cunqueiro, na VG-20, pero descoñecía se había persoas feridas.

Por iso, por parte do 112 Galicia alertouse a Urxencias Sanitarias de Galicia-061, que confirmou que catro persoas, aínda que non parecían revestir gravidade, resultaran feridas.

Ademais, ata o lugar desprazáronse, despois de ser alertados polo 112 Galicia, axentes da Garda Civil de Tráfico, da Policía Local e o persoal do servizo de limpeza e mantemento da vía. Os Bombeiros de Vigo tamén foron informados.