A Xunta de Galicia anunciou este mércores que inicia a tramitación para ampliar o Instituto Feiral de Vigo (Ifevi), ao amparo da lei 3/2016, e solicitou ao Concello olívico que someta o proxecto a información pública durante 20 días e que emita o correspondente informe sobre os intereses municipais afectados.

A través dun comunicado, o goberno autonómico explicou que iniciará os trámites, a pesar de que “o Concello de Vigo non remitiu a información pola cal non desenvolve o proxecto a través dunha ordenación provisional”. “Por tanto, espérase que a administración local envíe toda a información da que dispón, e que remita o informe desfavorable de Navegación Aérea polo cal manifestou que non puido tramitalo”, apuntaron fontes o Executivo galego.

Un día despois de que o presidente Feijóo afirmase que “todo parece indicar” que non dará tempo a ter lista a ampliación do Ifevi para a próxima edición de Conxemar, o goberno galego anuncia que a tramitará ao amparo da lei 3/2016, á vez que reafirma o seu compromiso co recinto feiral, no que investiu “máis de 15 millóns de euros desde 2015”. A estes investimentos “sumaranse os 7 millóns de euros programados para a nova ampliación”, segundo a Xunta.

“TOMADURA DE PELO”

Pola súa banda, o alcalde da cidade, Abel Caballero, tachou de “tomadura de pelo” a actitude de Feijóo e do seu goberno, aos que volveu a acusar de “non querer” levar a cabo esa obra. A ese respecto, subliñou que a Xunta puido iniciar a tramitación hai 20 días e, paralelamente, sacar a obra a licitación, como fixo para a construción da nova estación de buses de Vigo.

Ademais, o alcalde insistiu en que sería “unha ilegalidade” dar unha licenza directa para esa obra, que non ten amparo no actual plan en vigor (o de 1993) nin no Plan de 2008 (anulado polo Tribunal Supremo). “Só hai unha forma de ampliar o Ifevi, e é a ‘lei Vigo’ (a lei 3/2016), non hai outra”, proclamou, e cualificou a Feijóo como un “farsante” por insinuar que a obra podería facerse de inmediato se non se anulou a PXOM ou mediante unha ordenación provisional. “Ou non sabe nada de urbanismo, ou mente”, concluíu Caballero.

Finalmente, o rexedor olívico criticou que a Xunta “segue sen enviar” o proxecto ao Concello de Vigo, nin ás entidades que deberán emitir os seus informes respecto diso.