InicioMedio Ambiente e PatrimonioA UVigo analiza a evolución das macroalgas das Illas Cíes

A UVigo analiza a evolución das macroalgas das Illas Cíes

O proxecto Alganat buscou crear unha ferramenta xeoespacial, innovadora e de baixo custo para cartografar e monitorar a presenza e o estado de macroalgas dun modo periódico.

PUBLICADO O

Un equipo de investigación da Universidade de Vigo (UVigo) desenvolveu un método para analizar a evolución da presenza de macroalgas ante o incremento da mortalidade dalgunhas especies causado polo quecemento global.

Durante o acto de presentación de resultados do proxecto Alganat, celebrado en Vigo, a profesora da universidade Celia Olabarría detallou que esta iniciativa, cofinanciada con fondos europeos, desenvolveuse en colaboración co Parque Nacional das Illas Atlánticas e a Fundación Biodiversidade do Ministerio para a Transición Ecolóxica.

Ademais, concretou que, a través de Alganat, buscábase crear unha ferramenta xeoespacial, innovadora e de baixo custo para cartografar e monitorar a presenza e o estado de macroalgas dun modo periódico. Así, a investigadora precisou que este proxecto, iniciado en 2019, foi levado a cabo por grupos de enxeñaría e bioloxía e que, mediante o mesmo, analizáronse especies de tres parcelas das Illas Cíes, situadas en Monteagudo e San Martiño.

A bióloga Marta Román precisou que o obxectivo desta iniciativa pasaba por cartografar as algas mediante imaxes satelitais, gratuítas, para así analizar a súa evolución ante un contexto de quecemento global. De feito, lembrou que o incremento da temperatura afecta o seu nivel de mortalidade, o que podería prexudicar ao ecosistema que se xera ao redor delas, e apuntou que xa se rexistraron descensos da biomasa de algas. Marta Román tamén incidiu en que a “saúde” destas especies afecta á economía galega dada a súa dependencia da pesca.

TOMA DE IMAXES

Adicionalmente, o investigador do grupo de Xeotecnoloxías Juan Luís Rodríguez indicou que a baixa resolución das imaxes captadas polos satélites non permitiu utilizalas para analizar a presenza de macroalgas nas illas.

Ante esta situación, apuntou que os investigadores optaron por tomar fotografías mediante aeronaves non tripuladas, ‘drones’, nas que se inseriron cámaras RGB, multiespectral e termográfica. Así, as aeronaves equipáronse cos distintos modelos de cámaras para tomar as distintas fotografías necesarias nun mesmo voo e reducir o tempo derivado do proceso.

Posteriormente, os investigadores descargaron as imaxes tomadas nas parcelas das Illas Cíes escollidas e cartografáronas. Ademais, etiquetaron os distintos xéneros e algunhas especies das algas fotografadas mediante a utilización dun software de código libre.

Previamente, o equipo de investigación realizara traballos de campo entre maio e outubro para coñecer as clases de algas presentes nas illas e poder incluír os seus datos nas imaxes obtidas polos ‘drones’ a posteriori.

Como consecuencia, Juan Luís Rodríguez subliñou que se conseguiu crear unha ferramenta de baixo custo que permite identificar algas verdes, pardas e vermellas cunha porcentaxe de acerto dun 60 por cento. Deste xeito, pódeaAse analizar a súa presenza e se se incrementa ou reduce a súa mortalidade. Con todo, o investigador concretou que a porcentaxe de identificación de especies diminúe canto maior sexa a cantidade de algas, dado que varias poden “solaparse nun mesmo píxel”.

Así mesmo, sinalou como futuras liñas de investigación a necesidade de obter imaxes dun modo constante que permitan analizar a presenza de algas, para o que expuxo a opción de acceder a satélites de pago.

ÚLTIMAS

Condenados a 5 e 4 anos de cárcere os dous acusados de dar unha malleira a dous mozos na rúa Hernán Cortés de Vigo

A sección quinta da Audiencia Provincial de Pontevedra, con sede en Vigo, condenou aos...

Máis de mil vigueses xa teñen representación no caso do Cártel dos Coches con 40.000 afectados en Galicia

A oficina de Vigo do despacho BGI LAW representa xa a máis de 1.000...

Novo desencontro entre traballadores de Vitrasa e a empresa que non cede a reitirar os expedientes contra traballadores

A reunión celebrada este luns entre o comité de empresa e a dirección de...

A Xunta apura ao novo ministro de Cultura para axilizar o proxecto da Biblioteca do Estado en Vigo

O conselleiro de Cultura, Educación, FP e Universidades, Román Rodríguez, trasladou ao novo ministro...