Baixo cánticos como ‘Naval solución, Xunta implicación’, centos de delegados sindicais da CIG no sector percorreron as rúas de Vigo nunha manifestación convocada polo sindicato para demandar unha “intervención pública e directa” do Goberno galego.

Así o reclamou o secretario comarcal do sindicato, Alberto Gonçalves, mediante a lectura dun manifesto ante a Delegación Territorial da Xunta, onde concluíu a marcha, iniciada ante as antigas instalacións do estaleiro Factorías Vulcano. Ademais, os delegados sindicais analizaron o futuro do sector nunha asemblea celebrada en Teis antes do inicio da marcha.

Nese sentido, o sindicalista criticou que o Executivo autonómico fose “incapaz” de convocar a mesa de contratación anunciada e lamentou que “mire cara a outro lado” ante a crise do estaleiro Hijos de J. Barreras, que se atopa en preconcurso e á espera de que o armador The Ritz Carlton Yacht Collection asuma a súa xestión para reestruturalo. De feito, a empresa necesita chegar a un acordo cos seus provedores ou o 2 de febreiro entrará en concurso de acredores.

En canto ao estaleiro Factorías Vulcano, Alberto Gonçalves afirmou que o risco da súa desaparición é “real”. Precisamente, o secretario comarcal de CIG-Industria de Vigo, Xulio Fernández, denunciou que a Autoridade Portuaria “pretenda” que as súas instalacións se utilicen para almacenar colectores en lugar de para continuar a actividade naval. O xuíz decretou en outubro a extinción colectiva de contratos dos traballadores do estaleiro vigués e ata o momento só transcendeu o interese dunha empresa de caldedería e reparación nos terreos. Pola súa banda, o Porto de Vigo aprobou en decembro o seu plan de empresa para 2020, que contempla, entre outros investimentos, a compra dun espazo anexo ao dominio portuario do estaleiro Vulcano.

DEMANDAS SINDICAIS

Ante esta situación, Alberto Gonçalves reclamou ao Goberno galego e ao Executivo central que tomen medidas para asegurar o mantemento do emprego e advertiu do prexuízo que o peche dos estaleiros causaría á industria auxiliar. Ante esa situación, o sindicato avoga pola intervención pública en sectores estratéxicos e por asegurar o futuro do naval mediante a toma do control público de Barreras e Vulcano ou, polo menos, a través do apoio a iniciativas que garantan o mantemento da actividade e os empregos.

Así mesmo, Gonçalves fixo fincapé no feito de que o sector naval supón unha parte “estratéxica” da economía da zona e asegurou que non é posible esperar para dar unha resposta a esta situación. Así, lamentou que os 10.000 empregos que xeraba o sector hai dez anos descenderon ata 2.000.

En relación ao sector da automoción, a CIG aposta por crear unha mesa galega da automoción na que se integre ás universidades, o clúster e os sindicatos, e por condicionar o apoio público ao mantemento do emprego, así como por pór en marcha unha tarifa eléctrica galega. Ademais, o sindicato denunciou que se sufriu un ERE no sector e que se “precarizaron” as condicións laborais dos empregados.

Nesa liña, o sindicato incidiu en que o peso do sector industrial no Produto Interior Bruto (PIB) descendeu un 1,57 por cento entre 2010 e 2016, mentres que na Coruña se incrementou nun 21,54 por cento. Tamén apuntou que os resultados do Valor Engadido Bruto (VEB) de entre 2010 e 2016 da rama industrial retrocederon un 6,59 por cento na área olívica, a pesar de que na Coruña ascenderon un 9,28 por cento.

En canto á calidade do emprego, a CIG criticou que, no primeiro trimestre de 2019, se sumasen 7.000 empregos indefinidos menos que en 2009, mentres que a cifra de eventuais se incrementou en 2.300.