O grupo Vicalsa defendeu a viabilidade do seu proxecto para as instalacións do estaleiro Vulcano (en proceso de liquidación) no barrio vigués de Teis, e asegurou que xa presentou ao Porto un plan de investimento de 10,5 millóns de euros.
Así, a través dun comunicado, a empresa de calderería e reparación insistiu na súa intención de facerse con esas instalacións (concesionadas polo Porto) para levar a cabo un proxecto industrial de construción e reparación naval, “avalado pola dilatada experiencia” que ten neste sector.
Vicalsa saíu así ao paso das manifestacións do presidente do Porto de Vigo, Enrique López Veiga, quen defende que non pode prorrogar a concesión porque Vulcano está extinguida como sociedade, e os terreos que ocupaba deben saír a concurso.
Ademais, o responsable do organismo portuario negou que Vicalsa presentase un proxecto concreto para ese espazo, e cinguiu o seu interese a un contacto informal para preguntar sobre a posible prórroga da concesión.
Fronte a esta postura, Vicalsa precisou que “xa se entregou o plan de investimento en detalle ao Porto de Vigo”. “Trátase dun plan serio de 10,5 millóns de investimento, que implicará creación de emprego (…) e que podería facer das instalacións de Teis un estaleiro moderno e competitivo, que se podería converter en referente internacional”, proclamou a empresa.
Así mesmo, expresou a súa confianza en que, na reunión do Consello de Administración do Porto do próximo venres “se aborde a cuestión dos terreos”, aínda que López Veiga sinalou nas últimas horas que non está previsto na orde do día.
“RESPECTO” PARA A SÚA PROPOSTA
Vicalsa pediu “respecto” para a súa proposta, despois de que o presidente do Porto sinalase que a entidade “non vai regalar” ese espazo nin cedelo para que se instale “un taller de chapa e pintura“. “Non estamos a falar dun taller de chapa e pintura, senón dun estaleiro que terá unhas instalacións e medios moito máis avanzados e modernos que os actuais; polo que pedimos responsabilidade e respecto”, afirmaron fontes do grupo empresarial vigués.
Finalmente, detallaron que o seu proxecto “xa está en mans do Porto, da Xunta e do Concello de Vigo“, e pediu ao Consello de Administración da Autoridade Portuaria que faga “unha análise rigorosa da proposta presentada e o seu impacto, e proceda a desbloquear esta situación”.
