A concelleira de Marea de Vigo, Oriana Méndez, reclamou un incremento do orzamento destinado polo Concello á loita contra a violencia de xénero, que este ano se situou en 13.000 euros, ao considerar que se trata dunha cifra “rídicula”.

En rolda de prensa e con motivo do Día Internacional da Eliminación da Violencia contra a Muller, Méndez denunciou así mesmo que, no que vai de ano, o Consistorio só executa 550 dos 13.000 euros consignados para este fin.

Por este motivo, recalcou a necesidade de aumentar a asignación económica destinada á loita contra a violencia machista co obxectivo de que “sexa efectiva”.

Ademais, a concelleira instou ao Concello a elaborar un plan enfocado en alcanzar a “igualdade de oportunidades” entre homes e mulleres que sirva como ferramenta para levar a cabo distintas actividades e programas nesta liña na cidade olívica.

Oriana Méndez tamén criticou que a maior urbe galega non se integrou na rede #EnNegroContraAsViolenciasMachistas e demandou a súa inclusión na mesma, que, segundo lembrou, aglutina a máis de 130 concellos, así como a distintas entidades.

PROPOSTA

Adicionalmente, apostou pola posta en marcha dun protocolo específico de loita contra a violencia de xénero en eventos multitudinarios. A ese respecto, lembrou que Marea de Vigo xa demandou o desenvolvemento desta iniciativa co obxectivo da súa posta en marcha nas festas estivais e insistiu na importancia da súa activación nestas datas debido á afluencia que se espera durante a tempada do Nadal.

En concreto, Méndez avogou pola instalación de puntos violeta en eventos multitudinarios para alertar do “perigo de que se produzan casos de violencia machista”, así como por utilizar estes postos para atender ás mulleres que o necesiten.