O VIII Salón CarOulet de Vigo reunirá un milleiro de coches de ocasión no Instituto Feiral da cidade olívica, nun evento que se celebrará este fin de semana e no que se esperan case 20.000 visitantes.
O certame foi presentado este martes en rolda de prensa, e os seus organizadores confirmaron que, como cada ano, os concesionarios oficiais envorcáronse “para liquidar os seus stocks de vehículos automatriculados, seminovos, de xerencia, ‘quilómetro cero’ ou de frotas de aluguer.
O Salón ocupará os pavillóns 1 e 2 do Ifevi cun milleiro de coches (entre vehículos en exposición e reposicións), e abrirá as súas portas este venres ás 16,00 horas, e ata as 21,00 horas. O sábado e o domingo o horario será de 11,00 a 20,00 horas.
A entrada custará 2 euros, aínda que os menores de 10 anos poderán acceder gratuitamente. A organización doará a metade da recadación a Aldeas Infantís SOS de Galicia.
