O Concello de Vigo porá en marcha estes días unha campaña publicitaria, coa instalación de decenas de carteis ou ‘mupis’ en 9 cidades de España e tres de Portugal, para convidar os habitantes destas cidades a visitar a cidade olívica e gozar da iluminación e a ambientación do Nadal.
Así o anunciou o alcalde, Abel Caballero, nunha rolda de prensa na que explicou que estes carteis promocionais exhibiranse en Pontevedra, Oviedo, Xixón, Avilés, Salamanca, Burgos, Vitoria, Bilbao e San Sebastián. Os ‘mupis’ tamén se instalarán nas cidades portuguesas do Porto, Braga e Coimbra.
Ademais, o rexedor desprazarase este martes a Madrid para inaugurar unha exposición na estación de autobuses da capital (Estación Sur), na que se recollerán imaxes do Nadal en Vigo, así como un gran anuncio convidando os madrileños a visitar a cidade olívica nestas datas festivas.
“Queremos que Madrid saiba aínda máis do noso Nadal. E tamén é para que o alcalde renuncie a calquera expectativa e esperanza de gañarnos”, chanceou Abel Caballero, quen matizou que o di “con agarimo e con respecto”: “Botarme a min un pulso co tema de luces de Nadal…, polo menos hai que terlle agarimo, porque vai perder por goleada”.
