O grupo municipal Marea de Vigo presentou este xoves as emendas que, a través do Grupo Común da Esquerda, presentará aos orzamentos da Xunta para 2020, e que suman uns 12 millóns de euros.
Segundo explicou o portavoz do grupo, Rubén Pérez, as contas presentadas polo goberno de Feijóo son “electoralistas” e deseñadas para “vender o novo papel da delegada da Xunta” na cidade, Corina Porro, con anuncios de proxectos aos que apenas se dedican investimentos.
Marea reclamou, nas súas emendas, que a Xunta asuma o 50 por cento do custo das bolsas de inglés que se dan desde o Concello olívico, porque esas competencias corresponden á autonomía e ao goberno central.
Así mesmo, propoñen unha partida de 3,5 millóns para apoiar á industria naval da cidade; recuperar a partida de case un millón de euros para a construción dunha residencia de maiores (noutro barrio distinto a Teis, xa que a prevista nos terreos da ETEA será sufragada pola Fundación Amancio Ortega); ou 100.000 euros para redactar o proxecto dun IES para Navia.
Tamén piden unha partida de 300.000 euros para sufragar a apertura de comedores escolares no verán; incrementar en 400.000 euros a achega ao museo MARCO; ou destinar 3 millóns a un plan de investimentos do Consorcio do Casco Lanuxe.
Finalmente, Marea de Vigo pide, entre outras partidas, un fondo de compensación a familias polo fin do Plan Vivenda dotado con 2 millóns de euros; que se destinen 500.000 euros a rematar actuacións na EDAR do Lagares (como unha pantalla vexetal para protexer dos cheiros e gases ás vivendas próximas); e outras dotacións orzamentarias.
