A secretaria xeral de Igualdade, Susana López Abella, visitou este mércores en Vigo o Colexio Apostol Santiago Xesuítas, onde inaugurou a exposición ‘Cartas de Amor’, que ten como obxectivo concienciar á mocidade galega das diferentes formas da violencia de xénero.

Tal como explicou a Xunta nun comunicado, ‘Cartas de Amor’ é unha mostra do cómic galego sobre violencia de xénero, que ten como finalidade sensibilizar a mocidade da existencia de violencia nas súas relacións de parella e nos seus modos de relacionarse.

Con ela, o Goberno galego pretende axudar aos mozos a darse conta de que formas e modos de comportamento habituais, como as demostracións de celos, o control sobre a vestimenta da parella, as súas chamadas telefónicas, as súas mensaxes e a limitación dos seus movementos en relación ás súas amizades, entre outros aspectos, “son en realidade demostracións dun comportamento violento”.

A exposición está composta por traballos de Miguel Calatayud (premio nacional de ilustración), Paco Roca (premio nacional de cómic), así como outras figuras galegas, como Patricia Castelao, Pirusca, David Pintor e Óscar Villán. Tamén participaron autoras e autores que están a conseguir “gran éxito” entre á xente máis nova, como Eva Vázquez, Javier Olivares, Primitivo, Sonia Puído, Jack Mircala ou Sergi San Julián. Pola súa banda, o escultor Méndez, a escritora Anxos Sumai e o deseñador Fausto, uníronse a esta mostra con tres achegas diferentes. Está acompañada, ademais, dun Taller Práctico explicativo da mesma.