Os candidatos de Galicia en Común (Unidas Podemos) ao Congreso, Yolanda Díaz e Antón Gómez Reino, denunciaron este xoves a “complicidade” entre Porto de Vigo, alcaldía e Goberno en funcións para amparar a ampliación dos terreos portuarios de Bouzas cun novo recheo, e criticaron que se pretenda dar luz verde a este proxecto “pola porta de atrás” e de maneira “irregular”.
Así, durante unha visita á zona de Bouzas, na que estiveron acompañados polo candidato por Álava e coñecido activista ambiental Juantxo López de Uralde, Yolanda Díaz vinculou esa “complicidade” e esa forma de actuar coas “vellas políticas do bipartidismo”.
Segundo advertiu, o Goberno de España (nunha resposta a Unidas Podemos) aceptou que o plan de usos do Porto non é un instrumento de ordenación urbanística, por tanto, a modificación que permite os novos recheos non require dun estudo de impacto ambiental. “É unha barbaridade, é volver ao século XX e dilapidar os dereitos ambientais. Non se pode falar de transición ecolóxica cando se están esnaquizando as rías”, sentenciou.
A candidata de Unidas Podemos por Pontevedra criticou tamén a “gran opacidade” coa que, ao seu xuízo, está a actuar a Autoridade Portuaria de Vigo e fixo un chamamento ao Goberno central para que “rectifique” a súa posición sobre o cambio do plan de usos.
Na mesma liña, Antón Gómez Reino lamentou que se queira usar unha forma “irregular” de “legalizar” estes recheos “pola porta de atrás”, sen informe ambiental, e trasladou o “compromiso” de Unidas Podemos de apoiar as demandas dos colectivos ecoloxistas que denuncian estes recheos.
LÍDERES DA “BATALLA ECOLOXISTA”
Pola súa banda, López de Uralde reivindicou que, nos últimos anos, Unidas Podemos “foi a forza que liderou a batalla ecoloxista” no Congreso dos Deputados, e lembrou, como un dos últimos exemplos, a declaración de Emerxencia Climática.
Así mesmo, reafirmou o seu compromiso de “continuar” esta loita, porque “o ecoloxismo non se di, faise”, e incidiu na importancia do “voto verde” nas próximas eleccións xerais, nun contexto de “crise ecolóxica de gran magnitude”.
Finalmente, o portavoz de Marea de Vigo-Son en Común, Rubén Pérez, lembrou que os recheos en Bouzas e noutras zonas da ría, como Rande, son unha “preocupación histórica da esquerda ecoloxista e os movementos sociais” da cidade, e pediu aos deputados que saian elixidos o próximo 10 de novembro que convertan esa cuestión en “prioritaria”.
“Nós tamén tentaremos que haxa unha sensibilidade municipal. Porque para estas cousas, Concello e Porto parecen de acordo. Para as responsabilidades polo accidente do Marisquiño non, pero para isto si”, engadiu.
